زلیم خان یعقوب )خاطیره لرده(

عؤمور خاطیره یه دؤنر یا دؤنمز
ایللرین ایزی وار خاطیره لرده
اؤتن اییاملارین کئچن گونلرین
دادی وار دوزو وار خاطیره لرده

او زامان اکمیشدیم ایندی بیچیرم
بیر کورپو سالمیشدیم اوسده ن کئچیرم
چؤرک دی یئییرم سودو ایچیرم
قیسمت وار روزی وار خاطیره لرده

باخدیمی سینادیم آتدیغیم زرنن
نه لرنن یاشادیم آللاه نه لرنن
یئنه قوجاقلاشدیم خاطیره لرنن
بیر عشقین کؤزو وار خاطیره لرده

اؤلدوم بیر دوداقی بال قیزدان اؤترو
اؤلمه دی من تک یالقیزدان اوترو
دورور او چیچک لی یال، قیزدان اؤترو
بیر مه لر قوزو وار خاطیره لرده

ییخدی یئنگه لری یئلی حسرتین
یاپیشدی یاخامدان الی حسرتین
آغلیمی اوچوران دلی حسرتین
اریمه ز بوزو وار خاطیره لرده

فیکیری بولودلاردا کمنده دؤنن
عشقی جیدیر واختی سمنده دؤنن
بیر کندده دوغولوب مین کنده دؤنن
شاعیرین گؤزو وار خاطیره لرده

اؤلدورور آنانی آلیر آتانی
قورتارماق ایسته میر چایدا باتانی
تاختین چئوریله نی باختین یاتانی
واختین سرت اوزو وار خاطیره لرده

ذیکر ائدیر نامازی قیلان ، دانیشمیر
درین خیاللارا دالان دانیشمیر
کئچمیش اینسانلارا یالان دانیشمیر
هر شئیین دوزو وار خاطیره لرده

خیالا گلنلر نه دادلی گلیر
خیالا نه گلسه قانادلی گلیر
باخیرام آرخادان بیر آتلی گلیر
یوللارین توزو وار خاطیره لرده

یانار اوجاقلارین اود آلاو اوغلو
چیچک پروانه سی ، چول چمن اوغلو
بیر تورپاق دلی سی بیر وطن اوغلو
زلیم خان اؤزو وار خاطیره لرده

ايلاهي! (زليم خان)

ايلاهي! (زليم خان)

 

بير ميللت دير، بير تورپاق دير، بير وطن

اوتاي نه دير، بو تاي نه دير، ايلاهي؟!

هر طرفه پاي وئريبلر حسرتي

او پاي نه دير، بو پاي نه دير، ايلاهي؟!

 

عئيني باغدير، عئيني باغچا، عئيني بار

عئيني سازدير، عئيني كامان، عئيني تار

اورتاليقدا دمير حاسار، لاي ديوار

او لاي نه دير، بو لاي نه دير، ايلاهي؟!

 

اوستوموزدن آجي يئل كيم، اسن كيم؟

كسيلن بيز، كسديرن كيم، كسن كيم؟

آمان قارداش دء من كيمم، دء سن كيم؟

او هاي نه دير، بو هاي نه دير، ايلاهي؟!

 

ميلله ته باخ دمير توردان بويلانير

ديري ائودن، اؤلو گوردان بويلانير

يئتدي بوردان، يئتميش اوردان بويلانير

او ساي نه دير، بو ساي نه دير، ايلاهي؟!

 

هانسي باشدير، هانسي بدن، بيلينمز

پارالانسا وارمي وطن، بيلينمز

اوردا اؤلن، بوردا ايتن، بيلينمز

او واي نه دير، بو واي نه دير، ايلاهي؟!

 

باي اولماسين، قاري دوشمان باي اولدو

چوخ عؤمورلر نيسگيللره پاي اولدو

ايكي ياندا گؤز ياشيميز چاي اولدو

او چاي نه دير، بو چاي نه دير ايلاهي؟!

 

بو صؤحبتي اورتاليغا كيم ساليب؟

بو حسرتي اورتاليغا كيم ساليب؟

اوتاي نه دير، بو تاي نه دير، ايلاهي؟!

او درد نه دير، بو واي نه دير، ايلاهي؟!

 

(زليم خان يعقوب- تبريز،ايول1993)

زلیم خان یعقوبدان بیر نئچه شعر

زلیم خان یوسیف اوغلو یعقوب (زلیم خان یعقوب)

زلیمخان یعقوب

 

زلیمخان یعقوب 2/1/1950 اینجی ایلده گورجستان جمهورییتینین بولنیسی ائلینین«کپنکچی» کندینده آیدین بیر عایله ده دونیایا گلدی. آتاسی فن معلیمی اوْلسادا ادبییاتا اۆستونلوک وئریردی. آناسی گۆللو خانیم تۆرک فولکولورونون یاخشێ بیله‌نی ایدی. اؤزللیکله بایاتیلار، ناغیللار، داستانلار ساحه‌سینده تانینمیش بیله‌نلرده‌ن ایدی. آیرێجا آنا طرفینده ده‌یرلی شاعیرلر واریدی. بویوک دده‌سی«آلخاص آغا حاج عالی اوغلو»‌نو تانێمایان یوخ ایدی.1967 اینجی ایلده دوْغما کندینده اوْرتا مکتبی قۇرتارێب آذربایجان دؤولت بیلی‌یوردونون کیتابخانه‌چیلیک فاکولته‌سینی بیتیردی. ادبی یارادێجیلیغا 15 یاشینداایکن «مئشه‌بی» آدلێ لیریک شعرله باشلادێ. ایلک شعری بولنیسی‌نین «غلبه بایراغی» غزئته‌سینده یایێنلاندێ. 1968 ایجی ایلینده باکی‌یا یئرله‌شدی. ادبی، اجتماعی فعالییتینی باکی‌نین ایستی قۇجاغێندا آذر کیتاب تشکیلاتیندا ساتیجی، باش ساتیجی، شعبه مودورو، کؤنۆللو کیتاب سئورلر جمیعتینده مرکزی یایین مودورو، یازیچی نشرییاتیندا ادبی شعبه مودورو کیمی وظیفه‌لرینده باشلادێ 1995 و 2000 ایجی ایللر ایکی کره اولاراق آذربایجان میللی مجلیسینه باکی‌دان میللت وکیلی سئچیلدی

ادامه نوشته