بس سنه کیم آغلایاجاق

      بس سنه کیم آغلایاجاق

 

گون گله جک من اولنده چوخ دوداقلار بوزوله جک

حاییف دئیه گوزیاشلاری یاناقلاردان اوزوله جک

قاتار – قاتار میصراعلاریم دوداقلاردا دوزوله جک

آیریلیغیم چوخ اوره یی چالین _ چارپاز داغلایاجاق

          بس سنه کیم آغلایاجاق

 مجنون اولوب قالاسی یام،محبتین چولونده من

حسرتلره دونه سی یم عشق اهلی نین دیلینده من

چیناراولوب بیته سی یم زامانلارین یولوندا من

هئیکل له نن عومروم گونوم عصیرلری حاقلایاجاق

         بس سنه کیم آغلایاجاق

چوخ گزمیشم دوستلاریملا بوداغلارین اته یینده

مین_ مین اولمز خاطیره م وار هر گولونده ،چیچه یینده

نیسگیل لریم چالیندیقجا چوبانلارین توته یینده

یولدان اوتن هریولچونو ایختیارسیز ساخلایاجاق

       بس سنه کیم آغلایاجاق

بیر کوز کیمی اته یینده ساخلار منی داییم کولوم

هر باهار دا چیچک آچار،هرپاییزدا سولان گولوم

بوینون ایه ن بنووشه لرآغلارمنه ظولوم_ظولوم

منیم آرزوم خالقین عشقی،قیریلدیقی تاغلایاجاق

       بس سنه کیم آغلایاجاق

من عشقیدن یارانمیشام جان باغیشلار یارا یاردا

باخ گور نئجه نسیمی تک بابالاریم قالدی داردا

کرم لریم اوردا یاندی،له له لریم قالدی قاردا

واخت گلجک آه _ آمانیم هیجران یولونو باغلایاجاق

          بس سنه کیم آغلایاجاق

ستار گول محمدی

 

ستار گول محمدی ائل شاعری...

 ستار گول­محمدي 1322-جي گونش ايلي آرازين قيراغيندا، آيريليق كؤرپوسوندن بير آز اويانا فيضولي رايونونا قارشي اولان شوجئيلي كندينده دونيايا گؤز آچدي، 20 ياشيندان يازيب ياراتماغا باشلادي. 1358-جي ايل  "سئچيلميش اثرلر" آددا شعر توپلوسو ايشيق اوزو گؤردو. اوندان بئله 30 ايل اولار آرا- سيرا بعضي قازئتلردن باشقا هئچ بير اثر يايماغا مئيل گؤسترمه­دير. بو اؤزل سايي ستارا لاييق بير ايشدير.

"آرازام كوره بنديم" ستار گول محمدي حاقدا گونش درگي­سينين يايديغي اؤزل سايينين آدي­دير. بو اؤزل سايي­ني بير يئره توپلويانلار؛ اوختاي قاراداغلي و ياشار گونئيلي­ جنابلاريدير. بو درگينين ديزاينئري علي رضايي و قابيق ايشلري مهيار عليزاده(آيخان)يه عاييددير. 2000 تومن قيميتي و 112صحيفه­سي واردير كي اوچ بؤلومدن باشا گليب؛ 1-مقاله­لر(دوكتور صديق، ائل اوغلو،‌ حبيب فرشباف، محمد حافظ­زاده، دوكتور حسن رياضي، عليرضا ذيحق، علي جاوادپور، بهروز ايماني، رضا همراز و...) 2-شعر تؤحفه­لري(حبيب فرشباف، علي جاوادپور، هاراي، سليمان جودي(ثالث)، سعيد موغانلي و ...) و 3-ستاردان سئچيلميش 21 شعر.

 شاعیرین اثرلرینده گوزه چارپان اساس ایده یالار خلقه و وطنه صداقت،زحمتکشلرین حقوقوندان مدافیعه،وطن پرورلیک،ساده لیک و هرجوراستعمارعلیهینه چیخیش ائتمکدیر.

ستارگول محمدی متفکربیرشاعیراولاراق آذربایجان نین شیفاهی ادبیاتی نین یئتیشمه سینده موهوم بیر رولو واردی.....

ستار گول­محمدي­نين ياراديجيليغي، ياشاييشي و... حاقدا دانيشماغي سيزين اؤز عؤهده­زه قويوروق.

ادامه نوشته